Hman lai hian nula pakhat mitdel hi a awm a. A mitdel avang chuan engkim mai hi ninawm a tiin, a nun chu hreawm takin a hmang ṭhin a. A nunah chuan hmangaih pakhat chiah a nei a, engtik lai maha thlahthlam ngai lotu a bialpa chauh chu a ni. A bialpa chuan a hmangaih em em mai a, nupui atan a sawm ta hial a. Nimahsela, chu nula chuan, "Mitdel ka ni a, ka nei thei lovang che. Ka mit hi var sela chuan ka nei ngei ang che.", tiin a chhang ta a.
Hun a lo liam zel a, nikhat chu a bialpa chuan thu lawmawm tak mai a hrilh ta a. Tu emawin chu nula tan chuan a mit a hlan phal tih thu hi a ni. Chu nula chu a lawm em em mai a. Doctor-te chuan theihtawp chhuahin a mit chu an zai sak ta a, a mit chu thlâk sakin tunah chuan khawvel chu a lo hmu ve thei ta a ni.
Nula chuan engkim a hmu thei ta chu nuam a ti em em mai a. A bialpa chu a bulah a lo kal a, "Tunah chuan hei engkim i hmu thei tawh a, min nei duh tawh ang tiraw?" tiin a zâwt ta a. Chu nula chuan a bialpa chu a han en a, a bialpa pawh chu mitdel a lo ni ve reng mai tih a han hriat chuan mak a ti em em a.
A bialpa mit a del tih a hriat hnu chuan, pasal atan a nei duh ta lova. A bialpa chu a kalsan ta a ni.
Nakinah chuan chu nula chuan lehkhathawn hi a dawng a. A bialpa hlui hnên aṭanga a dawn a ni. Chu lehkha thawnah chuan thu tlemte hi a lo inziak a:
"I lakah engmah ka beisei tawh lo, ka mit kha ṭha takin i lo enkawl dawn nia."
tih thu hi a lo inziak a ni.
A zirtir: I dinhmun chhiat laia i thil neih te kha, i dinhmun ṭhat hnuah thlathlam mai suh. Hlawhtling tura pui tu che leh i harsat huna i kianga awm reng ṭhin kha; i hlawhtlin hnuah pawh i kiangah awm tir zel ang che.
 |
| Nula Mitdel |
0 Comments